GAUCHER DE CHATILLON. 163 LXXVII. DE GAUCHER DE CHATILLON, DE L'ÉVÊQUE DE SOISSONS MARTYR ET D'UN RENÉGAT. 390. Je ne vueil pas oublier aucunes' besoignes qui avindrent en Egypte tandis que nous y estiens. Tout premier je vous dirai de mon signour Gauchier de Chasteillon, que uns chevaliers, qui avoit non mon signour Jehan de Monson, me conta que il vit mon signour de Chasteillon en une rue qui estoit ou kasel là où li roys fu pris; et passoit celle rue toute droite parmi le kasel, si que on veoit les chans d'une part et d'autre. En celle rue estoit mes sires Gauchiers de Chasteillon, l'espée ou poing, toute nue. 391. Quant il veoit que li Turc se metoient parmi celle rue, il lour couroit sus, l'espée ou poing, et les flatoit hors dou casel; et au fuir que li Turc faisoient devant li (il qui traioient aussi bien devant comme dariere) le couvrirent tuit de pilez. Quant il les avoit chaciez hors dou kasel, il se desflichoit de ces pilés qu'il avoit sur li, et remetoit sa cote à armer desus li, et se dressoit sur ses estriers, et estendoit les bras atout l'epée, et crioit « Chasteillon, chevalier! où << sont mi preudome? » Quant il se retournoit et il veoit que li Turc estoient entrei par l'autre chief, il lour recouroit sus, l'espée ou poing, et les enchaçoit ; et ainsi fist par trois foiz en la maniere desus dite. 392. Quant li amiraus des galies m'ot amenei de vers ceus qui furent pris à terre, je enquis à ceus qui estoient entour li; ne onques ne trouvai qui me deist comment il fu pris, fors que tant que mes sires Jehans Fouinons, li bons chevaliers, me dist que, quant on l'amenoit pris vers la Massourre, il trouva un Turc qui estoit montez sur le cheval signour Gauchier de Chasteillon; et estoit la culiere toute sanglante dou cheval. Et il li demanda que il avoit fait de celi à cui li chevaus estoit; et li respondi que il li avoit copei la gorge tout à cheval, si comme il aparut à la culiere qui en estoit ensanglantée dou sanc. 393. Il avoit un mout vaillant home, en l'ost, qui avoit à non mon signour Jaque de Castel evesque de Soissons1. Quant il vit que nos gens s'en revenoient vers Damiete, il qui avoit grant desirier de aler à Dieu, ne s'en vout pas revenir en la terre dont il estoit nez; ainçois se hasta d'aler avec Dieu, et feri des esperons, et assembla aus Turs touz seux, qui à lour espées l'occistrent et le mistrent en la compaingnie Dieu, ou nombre des martirs. 394. Endementres que li roys atendoit le paiement que sa gent fesoient aus Turs pour la delivrance de son frere le conte de Poitiers, uns Sarrazins mout bien atiriés et mout biaus hom de cors, vint au roy et li presenta lait pris en pos, et flours de diverses colours et manieres, de par les enfans le Nasac, qui 1. Joinville a été trompé ici par un feux souvenir: le véritable nom de cet évêque est Gui de Château Porcien. |
