coverlyte of hir bed is a letter of swiche vertu, that whoso ever gothe with hir to bed, he shall anon falle into a dede slepe; and he shalle not wake til time that hit be put awey; and therfor when thou comest to hir bed, seche a twene the shete and the coverlyte, and thow shalt fynde the letter; and when thow hast founde hit caste hit fer from the bedde, and then entre into the bed, for thou shalte not slepe til tyme that thow haste doon thi wille with the damiselle, and that shalle torne to the gret honour and joye. The knigte toke his leve at Virgile, and thonkid him moche of his hie counseill and yede to the damysell, and yafe hir the monye. When nygt come the knigt enterid the chaumber, and preveli putte his honde bitwene the coverlite and the shete, and there he fonde the letter; and whenne he hadde hit he caste hit fer fro the bedde, and lay downe and feynid as he hadde islepte, and thenne the damiselle knowing that he had yslepte as he dude afor, she caste of hir clothis, and went to bedde. Anon the knigte sette hande to hir as is the maner of bed, and she perceyved that, and prayd him of grace, and to save hir maydinhede, and I shall dobble al the monye that thow hast yevin to me and yeve it to the.

And aftur he lovid hir so muche that he drow so

moche to hir compane that he forgate the mar chaunt and the day of payment was passid by the space of xiiii dayes. And as he lay in a certen nyght in his bed, hit come to his mynde the day that he made to the marchaunt, and alle his bowells wer storid therewithe, and thenne said to her, Alas woman that ever I saw the, for 1 am but dede. I borowed for thi love swiche a some of mony for to pay at a certeyne day bi this conducion, that yf I pay not at my day he shall have full power for to hilde of the fleshe of my body with out contradiccion; and now my day is passid fourtenyte ago, so hih I sette myn hert in the. Then seide she, Sorowithe not so moche, gothe to him, and debbelithe the mony to him, and yf he wolle not, aske howe moche he wolle have, and I shalle paye it. Tho was the knigte com fortid. He yede to the citee, and there he mette with the marchaunt in the stret, and lowly he saluid him. Tho saide the marchaunt, So sey I not to the. Thenne seyde the knigte, Sir, for the trespas that I have made ayenste youre conven cion I wolle dowble the payment. Naye seide the marchaunt, that spake we not of, I wolle have right as thou dudest bynde the to me. Aske of me, quod the knight, as much mony as thou wolte, and thowe shalt be paide for my trespas.

It is veyne that thow spekist, quod the marchaunt, for thowhe thou geve to me al the gode of thi citee, I wolle have the covenaunt I holde, and non othere wolle I have of the than as the charter asselid makith mencioun of; and anon he made the knigt to be itake and lad to the castell, and sette him in a safe ward, abyding the justice. When the juge was come and satte in the dome, the knigt come to barr among other prisoners, and the marchaunt shewid his lettire afor the juge. Anoon as the juge sawe there his owne dede, he said to alle that stode aboute, Sirs, ye know welle it is the law of the emperour that yf enye man bynde him by his owne freewille he shal resseyve as he servithe, and therefore this marchaunt shalle have covenaunt as lawe wolle. Now in al this tyme the damysell his love had sent knigts for to aspie and enquer how the law was pursued ayenst him, and whenne she harde telle that the lawe passid ayenst him, she kytte of al the longe her of hir hede, and cladde hir in precious clothing like to a man, and yede to the palys there as hir lemon was to be demyd, and saluyd the justice, and all they trowid that she had be a knigte; and the juge enquerid of what contree she was, and what she had to do ther. She said, I am a knigte, and come of fer contree,

and her tithings that there is a knigte amonge yowe that shuld be demid to dethe for an obligacion that he made to a marchaunt, and therefor I am come to deliver him. Thenne the juge said, It is lawe of the emperoure that who so ever byndethe him with his owne propre wille and consent withoute enye constraynynge he shulde be servid so ayene. When the damisell harde this she turnid to the marchaunt and saide, Der frende, what profite is it to the that this knigte that stondithe her redy to the dome be slayne? it wer [better] to the to have monye than to have him slayne. Thou spekest al in veyne, quod the marchaunt, for withoute doute I wolle have the lawe sithe he bonde him so frely, and therefor he shalle have noon other grace than lawe wolle, for he come to me, and I not to him. I desirid him not thereto ayenste his wille. Thenne saide she, I praye the howe moche shall I yeve to have my petucion? I shalle yeve the thi monye double, and yf that be not plesynge to the, aske of me what thou wolte, and Thou shalt have. Then saide he, thow harde me never seye but that I wolde have my covenaunte kept. Sothely, seyde she, and thou shalt trowe me afor your [you] sir juge, and afor yowe alle, I sey now sir juge ywithe a right wisdome of that that I shal seye to

yowe; ye have ihard howe moche I have proferid this marchaunt for the lyf of this knigte, and he forsakithe all, and askithe the lawe, and that likith me moche; and therfore lordinges that beye her, herithe me what I shalle seye. Ye knowithe welle that the knigt bonde him never by letter but that the marchaunt shulde have power to kutte his fleshe fro the boons, but there was no covenaunt made of sheding of blode, thereof was nothing ispoke, and therefor late him set hond on him anoon, and yf he shede ony bloode with his shavinge of the fleshe forsothe then shalle the kynge have goode lawe upon him. And when the marchaunt harde this he said, Yef me my monye, and I foryeve my accion. Fforsothe, quod she, thou shalt not have oo penye, for afor al this companye I proferid to the al that I myght, and thou forsoke hit, and saydist with a lowde wyse, I shalle have my covenaunte; and therfor do thi beste with him, but loke that thow shede no blode I charge the; for it is not thin, ne no covenaunt was thereof. Thenne the marchaunt seynge this yede away confus. And so was the Knigt's lyf savid, and no penye ipayde. And she yede home ayene, and dude of that clothinge, and clothid hit as she was afor like to a woman. And the knigte yede home ayene, and the damiseli turnid and met him, and askid howe he had